Rett frå NM i Folkemusikk tok me tog, fly og tog att til Malmö i Sverike. “Me” er Guro Kvifte Nesheim, Sina Myhr, Hans Kjorstad og eg. I Malmö var me måndag og tysdag (29. – 30. juni) med på ein workshop saman med fire svenske ungdomar. Med oss var Vegar Vårdal, Patrik Andersson og komponisten Daniel Hjorth.

Me skal saman laga eit nytt folkemusikkverk som me vil framføra på Happy Days-festivalen i Oslo 19. – 23. august. Me skal ha ein workshop rett føre sjølve festivalen au, og eg meiner at det skal koma til endå fleire unge folkemusikarar då.

Me arbeidde mykje med klangbilete og stemning. Ei fela er ikkje alltid berre ei fela. Men no kan det henda eg ikkje bør seia for mykje. Folk fær heller koma til Oslo i august og høyra på.

Kategori: Uncategorized
Comments Off

Det er berre to vekor sidan NM i Folkemusikk stod på (23. – 28. juni), men det kjennest allereie lenge sidan. Sumarferie! Men no sette eg meg ned med ein kopp nytrekta kaffi og for skriva noko av det som hev hendt sidan sist. Eg vil her mest taka føre meg noko av den kritikken NM i Folkemusikk hev fenge. I år var Landskappleiken og Landsfestivalen for Gamaldans slegne saman til eit digert “NM i Folkemusikk”. Eg er ikkje veldig samd i NM-namnet, det fell ikkje naturleg for meg. Det høyrest ut som eitkvart idrottsstemne (fy-og-fy!), og kvar kjem dansarane inn i eit NM i FolkeMUSIKK? Likevel skal eg omtala dei ymse stemni med dei rette namni, for at det ikkje vert kluss.

Etter å ha lese nokre artiklar i ymse aviser, ser biletet ut til å vera at NM-et ikkje var so godt lika.  For stort, ugrei samanslåing av klassar, for mange tevlingar samstundes, og so bortetter. Kva tykte eg?

Eg var kjempenøgd. NM i Folkemusikk var fantastisk bra.”Problemet” med storleiken er arrangørane sitt, eg vil ikkje leggja meg opp i det. Eg tykte storleiken var perfekt. Yrjande liv på kvar ei tid av døgnet, brotevis av kjekke folk over alt! Det einaste var når du trefte folk og sa “..men me sest seinare!”, men såg dei aldri att i folkemengdi. Men jøss, skal ein på daud og liv hava tak i nokon skal vel ikkje det vera største kneiki i 2009. Storleiken til stemnet var best!

Plent samanslåingi av tevlingsklassar var noko ymis, der er eg samd. Eg ville ikkje vore glad for å tevla i lag med trekkspelarane dersom eg var durspelar. Skiljet mellom bygdedans- og gamaldansspel må ein ikkje sjå bort frå. Hadde flatfela og hardingfela vorte slegne saman, hadde eg skrike høgt. Og når det er tale om tevlingane, kva var greia med å trengja brorparten av deim saman på fredag og laurdag? Nett det var noko stor tøys. På onsdag og torsdag var det store hòl i programmet, eg gjekk rundt og dreiv dank. På fredag og laurdag derimot, måtte eg berre gjeva opp å sjå alt eg ynskte, for det var so mange tevlingar samstundes!

Matstellet må skal eg au seia noko på. Eg åt ikkje ein gong i matteltet. Vegetarianaren kika greitt opp på menyet over utsalet: “Fisk” til vinstre, “Kjøt” til høgre. Men himmel, det er då mitt problem kva eg et og ikkje. Hadde eg vore kjøtetar, hadde eg jamvel snutt då eg såg prisane.

Alt i alt meiner eg at det meste av det som NM i Folkemusikk no fær kvass kritikk for, kan rettast opp greitt. Dersom ein kan finna arrangørar som vil taka på seg noko so stort, so er det berre å sjå betre på klassesamanslåingi og spreia tevlingane meir jamt utover kappleiksdagane, og eg kan ikkje tenkja meg ein betre kappleik.

So det var det som var verdt å taka fram av klagor. Det er langt enklare å skriva nedsetjande enn motsett, det skjønar ein jo so snart ein tek i ei avis. Men eg sit attende etter enda stemne med ei positiv kjensla i meg. Eg fekk bilskyss opp til Geilo, og kom fram i god tid før opningskonserten og Open klasse. Det var sers lurt, tykkjer eg, å ha desse to i eitt. At nokon tør taka på seg dømingi i Open klasse er verkeleg imponerande. So få haldepunkt og so mykje synsing! Duoen Nina Fjeldet (flatfela) og Audun Fremmerlid Skjølberg (akustisk gitar, stålstrenger) vann. Eg tenkte det då eg sat og høyrde på, at dette kunne eg gjerne gjenge på konsert for å høyra. Gode vinnarar, til lukka!

Eg kan ikkje fortelja so frykteleg detaljert om heile kappleiken, for minni flyt meir eller mindre saman etter kvart. Ein typisk dag kunne sjå slik ut: Etter å ha stade opp og vakna (i den rekkjefylgja), var det å taka turen til butikken for å kjøpa eit langbrød og fruktsalat. Etter frukosten gjekk dagen med til tevlingar, treffa folk, spela, slappa av på klasserommet, dusjing osb. Eg var sers heldig og budde på klasserom i lag med ein brote Vinstra- og Annandstads-ungdomar, so på kveldane gjekk me gjerne og åt pizza. På lengre uti kvelden var det finalar, dans, med meir. Svevn er for dei svake, men NM-veka tok skikkeleg på.

Når det gjeld eigi tevling, so var eg oppe to gonger laurdag. Fyrst spela eg til dans. Torbjørn Bergwitz Lauen og Anbjørg Myhra Bergwitz dansa sørlandsspringar. Eg hev aldri spela til dans på Landskappleik/NM før, men det var løye. Dessutan kom dei på 11. plass av 49 trur eg, med 88 poeng. Hev eg skjøna dansepoengi riktig, so er det fyrstepremiegrad! Til lukka, Torbjørn og Anbjørg=)

Eg tevla au åleine, i hardingfele junior, og spela då to Marnardalsslåttar. Eg var tolleg nøgd med eigi speling, men ikkje resultatlista. 6. plass med 103 poeng, vel vel. Det var løye å tevla i alle fall=)

Takk til alle gode folk som gjorde NM i Folkemusikk til ei fantastisk oppleving for meg! Gleder  meg allereie til neste år!

Kategori: Uncategorized
1 kommentar »

Eg hev visst det lenge (og ikkje sagt det til ei sjel), men fredag vart det offisielt: Eg hadde fenge Drøymestipend, på 10 000 kr! Difor var eg sundag 07. juni i Fjellhallen på Lindesnes for utdeling av dette. Det var au mange innslag frå ymse kulturskular rundt i fylket. Det er lett å gløyma kor mykje flinke ungdomar der er rundt om, men eg vart huga til å få til noko med sume av desse, for dei var flinke mange.

Kva skal eg då gjera medan eg enno er rik? Vel, det er alltid ting som ein hev bruk for, og eg ynskjer jo alltid betre felor, men nett no er det gjerne eit ljodkort til Mac’en eg gjeng for med det fyrste. Det er ikkje oppmuntrande å høyra på opptak frå innebygd datamikrofon. Eg gjeng au rundt og er meir eller mindre hugteken av ei elfela som eg hev sett på ei stund, so kanskje det vert noko ut av det no?

Eg må med det same ynskja Snorre Log Skage til lukka med Drøymestipendet hans. Eg vart kjend med homon på UKM Landsmønstringi i Trondheim 2009. Han teiknar bilete som er som er so utførlege og nøgne at ein kan sjå på deim so lenge ein vil, og likevel ikkje oppdaga alle detaljane. Snorre er ein stilig og dyktig fyr, til lukka med stipend og alt!

Kategori: Uncategorized
Comments Off

Det er rart med hendingar, at dei plar klumpa seg saman på same tid. Når ein hev eit slikt fjell av gjeremål rett føre seg, klarar ein ikkje å sjå det som kjem etter. Ikkje lenge sidan oppdaga eg brått at det er berre om lag to vekor att til Landskappleiken, det kom som noko av eit sjokk på meg.

Laurdag stod eg opp umenneskeleg tidleg, for laurdag å vera, for å koma tidsnok til Kristiansand. Det var Open Dag på NRK-huset i byen, og Øyvind Liseth hadde tidlegare slengt inn ein søknad på eit tilbod om å få høve til å gjera ein profesjonell TV-produksjon der, og havt lukka med seg.

På eit speltile (norsk for ei scena, barsk eller kva?) i den store hallen var det rigga opp med mikrofonar og alt, og rundt oss var 5 kamera (på store fotballkampar plar vera 12 kamera sa dei…), og ein stor TV-produksjonsbuss som dei sender rundt til ymse greior. So spela me ein medley me laga føre UKM i år, om og om att, medan kamerafolki svirra rundt. Til slutt var produsenten i bussen nøgd, og me fær ein ferdig klypt “musikkvideo” so snart det er klart. Alt det utstyret på oss var jo noko av kanonar på sporvar, men sjølvsagt: di meir løye var det for oss=)

Seinare på kvelden spela eg på Internasjonal Kulturfest på Samsen Kulturhus, saman med Stian Hildebrand, ein dyktig beatboxer. Me hadde arrangert noko ut av Tango Tzigane Jalousie og Dovegubbens Hall. Det morosame var at me vart presanterte som “fusion av samtidsungdomskultur og norsk tradisjon”. Jammen godt at tango er rekna som norsk folkedans av NU, elles hadde det vorte bom! Det var uvant å spela slikt fiolinspel for folk, og serleg cadenzaen på byrjingi av Jalousie kunne ha vorte verkeleg undergang, men det gjekk, må eg seia, heilt fint, jamvel i dei høgste posisjonane. Fleire gonger den kvelden presenterte eg meg som fiolinist utan å tenkja meg om. Eg hev tinga time hjå lækjaren for dette, og vonar det gjeng over.

Kategori: Uncategorized
Comments Off

I etterkant av både sendingi den 31. mai og reprisa fekk eg vita at eg hadde vore å høyra på Folkemusikktimen på NRK P2! Tilmed nergaard.org hadde vorte nemnd! Visseleg er det for dårleg at eg ikkje høyrer på Folkemusikktimen kvar sundag, men det synest som at § Ørten i naturlovene seier at det aldri passer seg slik. Eg fekk heldigvis høyra greia på Verdsveven seinare.

Rett før Landskappleiken 2008 var eg på UKM Landsmønstringi i Trondheim. Der spela, song og fortalde eg slåtten, slåttestevet og historia til hallingen ‘Aller var eg glad’. Eg meiner at det er eit av dei beste arrengementi eg hev laga.

Etter UKM tok eg toget beint til Oppdal og Landskappleiken, og sat ein av dagane etter og skulle høyra på Open Klasse. Då var det at dei frå scena gjorde kjent at dersom nokon ville melda seg på DÅ, so opna dei for “spontanpåmelding”. Korleis kunne eg ikkje?

Vel, det veit ikkje eg heller. Difor vart det til at eg framførde “Aller var eg glad” på Open Klassa på Landskappleiken, og dette var det som vart sendt på Folkemusikktimen på P2. Eg vann ikkje Open Klasse, men ifylgje folkemusikk.no vann eg “sjarmøretappen”, og må seia meg veldig nøgd med det =)

Kategori: Uncategorized
Comments Off